吃喝玩樂

焗住要食!
三大快餐焗豬飯對決

巴絲打9個月之前發表

連鎖快餐店開到成行成市趕絕小店,但目前未有一個霸權真正霸佔香港成個市場。三大巨頭依舊連翻惡鬥,最悠久嘅戰場不得不提焗豬扒飯,話佢係快餐界豆腐火腩飯都唔離譜,作為平時午市、晚市選擇都叫入得吓口。好多人成日話唔再幫襯大集團,但現實歸現實,總有啲地點根本冇其他選擇。既然焗食,不如了解吓呢款名菜邊間整得最好食!
名不副實 大家樂「芝味厚切一哥焗豬扒飯」
第一間同大家試嘅係大家樂,一入到去見到個牌大大隻字寫住「芝味厚切一哥焗豬扒飯」,名堂堅有霸氣,令人期待!淨係兜飯計$38,係三間之中最平個飯好似預我實會拎走咁用錫紙兜直上.連焗飯通通常跟埋隻碟都慳返。

兜焗豬扒飯埋位第一件事梗係驗證塊豬扒有幾厚切,HiHi!得1cm,說好的「厚切」 呢?!咬落去原來仲有層炸皮,慶幸唔算太厚。肉薄又有皮,咁樣好心就唔好標榜 「厚切」啦,唔畀希望我,就唔會令我失望。唔通大家樂其他扒係更薄嘅?塊扒最長位置大約有13cm,闊9cm左右,全個兜本身幾細又唔深,先至顯得佢大。豬扒味道一般,計份量相信普通男士應該唔太夠食。

炒飯底算係不過不失,都算香口,又冇話太乾。最令筆者喜出望外嘅係個汁,蕃茄同菠蘿幾有鮮味,個汁夠濃得嚟唔會太酸,撈多碗飯都仲得!不過佢個名明明係寫住「芝味」,個汁上面係見到少少芝士,但完全冇芝士味道,要扣返啲分。

個汁真係好多料,又夠香

塊扒最最最長嘅位有l3cm

炒飯唔乾,合格

貴得有理 美心Food2「鮮茄焗豬扒飯」
美心快餐近年玩升格,分店視乎地段採用唔同面貌,甚至名都改埋。食物選擇都有分別,不過燒味飯、焗豬扒飯之類實係例牌項目,大家都係擔心價錢好過。美心Food2算係美心快餐系列嘅中檔,今次揀佢試完全係因利成便,冇其他原因。

三間當中以呢個「鮮茄焗豬扒飯」售價最高,要成$45,比另外兩間貴15%至18%,唔係公司贊助小弟都食晤起。貴價焗豬飯最與別不同嘅就係個賣相,鐡兜外邊再加個有柄嘅瓷碟,放入去size啱啱好,精緻之餘拎起嚟又唔會辣親,真係幾細心。

廣告牌件豬扒睇落係一塊過,但買到呢碟就係兩塊細豬扒,睇起嚟份量好似少咗咁。兩塊豬扒都係大約10cm長,5cm 闊,接近方型冇蝕到;厚度同大家樂嘅相近,而當中冇炸皮,即是實際上係比大家樂所謂「厚切」更厚,而且肉味較濃,淨計豬扒肯肯定係好食啲。

個汁有好多蕃茄、菠蘿甚至有埋洋蔥,感覺幾有誠意,之但係味道平平,唔算突出。食得出炒飯底比其餘兩間香口丁丁咁多,但同樣未至於明顯優勝。據個人經驗美心啲嘢一向味道偏淡,所以都唔知係咁啱定特登。由外觀到味道平均計呢個「鮮茄焗豬扒飯」真係唔錯,但考慮到佢貴過另外兩間幾多,性價比自然拉低咗。


個汁都算多料

分咗兩塊細扒。每款方型10 x 5cm左右,加埋唔細

個飯最靚係佢啦!

主菜出色 大快活「阿活焗豬扒飯」
大快活以橙色同啡色為主,而且燈光較暗,各間分店總有暗黑角落,有時令人覺得幾陰沉,食店外觀三間之中最晤吸引。不過今次淨係測試個焗豬扒飯,環境點樣冇所謂。當位阿姐拎碟豬扒飯上bar枱嗰吓令我有少少驚喜。三間之中呢碟係我最後食嘅焗豬扒飯,一望落去見到有咁大塊扒,即時睇高一線。不過個飯整體陣容同外觀就爭啲,係得塊扒上面齊齊整整咁放咗幾粒菠蘿做裝飾,個汁入面又咩配料都冇,十分平凡。

豬扒有成15 x 9cm咁大塊,更重要係, 佢比另外兩間都明顯厚咗。大家樂嗰塊扣埋炸皮可能只有佢一半嘅厚度,大快活呢塊先算得上係「厚切」呀!呢塊扒都係三間之中最有肉味、肉質最嫩同最juicy嘅 一塊,真係晤講得笑!輪到個汁,前面都提到佢冇乜料到,幾似就咁搵支茄汁倒落去就焗到變深色少少就算,味道偏酸,好彩量唔多,亦未至於遮到塊扒嘅味道。個炒飯底正正常常不過不失,最慘係冇蕃茄冇芝士冇洋蔥咩配料都冇,只有豬扒上面刻意但又格格不入嘅菠蘿粒,感覺好似蝕咗。「阿活焗豬扒飯」贏在塊扒,夠大塊,味道又好,真係攞晒分!再加上佢售價只係貴大家樂$1咁多,俾你你點揀吖?

同另外兩間比好拎大塊!

個汁乜都冇唔影喇,影吓塊真厚切豬扒好過

個飯不過不失

總結:
記得細個去快餐店食嘅焗豬扒飯多數都會有兩塊大大塊嘅豬扒,經過多年演變,而家塊扒大少少就要感動流涕,認真淒涼。好彩大快活仲交到貨,「阿活焗豬扒飯」平凡裡見不平凡,而且性價比高,有機會大家不妨試吓。

相關文章

更多文章

《鄧寇克大行動》
救得一個得一個

 KS 於 4小時之前發表

拍過漫天星際、超級英雄、罪犯,連至連超難拍魔術題材都有涉足的「神導」基斯杜化路蘭,今回首度觸及歷史題材,執導《鄧寇克大行動》—於二次大戰期間,英法聯軍於法國鄧寇克,被德軍步步進逼,...

詳細閱讀

《Pokemon Go》首個大型活動噓爆結束

 航仔 於 4小時之前發表

《Pokemon Go》喺香港嘅熱潮雖然減退,但外國仍然相當流行,早前Niantic公布於芝加哥Grant Park舉行首個大型活動「Pokemon Go Fest」,講到明會有稀...

詳細閱讀

集80年代流行文化大成
史提芬史匹堡新作《Ready Player One》

 航仔 於 5小時之前發表

導演史提芬史匹堡新作《Ready Player One》預告見街,正如改編自同名科幻小說,劇情同虛擬實境及大量流行文化元素有關。故事講述2025年現實生活枯燥無味,新世代人類「mi...

詳細閱讀

《Captain Marvel》發生於90年代
Nick Fury雙眼健全現身

 航仔 於 6小時之前發表

現時有關《Captain Marvel》電影資料相對較少,最近Marvel Studios總裁Kevin Feige喺SDCC座談會上終於透露相關資訊,電影故事背景定於90年代早期...

詳細閱讀

《正義聯盟》4分鐘預告暗示超人歸隊

 航仔 於 8小時之前發表

美國SDCC動漫展精彩消息一浪接一浪,先嚟係《正義聯盟》長達4分鐘嘅預告片,為導演薩克薛達離任後嘅首個官方宣傳片段,畫面較光猛,部分畫面色彩比上一段預告調得略為鮮艷。......

詳細閱讀

《悍戰太平洋2》宣傳短片曝光
五部全新機體亮相

 航仔 於 1日之前發表

機械人打怪獸自細睇唔少,但上得大銀幕而又夠熱血首推《悍戰太平洋》,續集《Pacific Rim: Uprising》宣傳短片以招聘駕駛員廣告形式公布,同時機甲獵人官網GoJaege...

詳細閱讀