吃喝玩樂

【有肋有唔肋】雲林米線大比拼

巴絲打9個月之前發表

近幾年,雲南米線店喺香港開到一地都係,梗有一間喺左近。既然米線高手雲集香江,不如搞返個雲林米線大比拼,睇吓邊間至耍家!四間「老是常出現」 嘅米線舖包括米線陣、譚仔雲南米線、譚仔三哥雲南米線及麻酸樂,究竟邊間湯底做得好?邊間小食有料到?睇落去你就知!
小食更好 麻酸樂
湯底認真麻麻。米線一上檯,筆者已經聞到陣奇怪味道,呢種味並唔係來自食物本身,就好似噴咗啲化學藥水,令人唔太開胃。之但係做得勇者,即使佢伏味濃都頂硬上。一試,雞湯雞到冇朋友,完全冇味,淡過腐皮;辣湯根本喺雞湯上面放一羹辣油了事,拎出嚟嗰陣仲有70%地區未染紅,撈勻咗比盡只係小辣,小辣得嚟又唔香,點都要扣分。

以揀嘅配料睇落比另外幾間多,佢有得加12蚊揀鹽酥雞同炸豬扒呢類幾有份量嘅配料。份量嚟計呢間算不過不失,鮮牛肉4至5塊,唔會用納米技術切割,食落亦覺嫩滑;墨丸4粒,細過譚仔少少,冇咁彈牙,唔叫難食,只係一拼之下難免失色。

龍崗雞就比米線好得多。今勻確實雞有雞味,皮滑肉嫩,重點係配汁同薑蓉,同鮮味十足嘅雞件好夾,一碟幾嚿雞加碟汁,絕對送到成碗飯。值得一提嘅仲有嘢飲:同其他米線店比,呢間花款較多,筆者叫咗杯樣子最伏嘅菊花杞子蜜。佢拎過嚟嗰陣用茶包裝住菊花同杞子•飲落幾滋潤,小甜唔膩,菊花同杞子唔會搶咗蜜糖味,有驚喜。

「少年你太年輕了」係麻酸樂畀筆者嘅第一印象。身為一間雲南米線店,請返嚟嘅伙計居然係講純正廣東話嘅MK仔[sosad],實在少咗一陣地道風味。一句講晒米線一定冇下次,至於會唔會為咗杯菊花杞子蜜再嚟就睇心情。其他肉燥飯雞扒飯之類,menu張相影得唔差嘅,是咪伏就留畀大家去試喇。

麻辣鮮牛墨丸米線$37

菊花杞子蜜$12 ,鹹檸七$12

龍崗雞$36

餐牌上選擇甚多
湯濃料足 譚仔雲南米線
譚仔湯頭有兩大特點,其一係好濃味,調味重手,碗清湯白過牛奶,化咗妝咁款,啱晒重口味嘅香港人;其二係辣嘅分級比其他店更仔細 一筆者食開中辣,叫有啲辣又唔會辣到第二日菊花痛。不過,你唔好睇碗湯紅晒,就以為真係好辣,筆者覺得譚仔大辣同小辣之別只係辣粉落多落少,而實情辣粉落太多並唔代表好食,就好似鹽太多搞到啖湯嘅平衡錯晒。

「勿演懶肉中喇」、「勿演淆肉炸中千攤」兩碗料多到唔講得笑,腐皮芽菜唔駛講,剩計腩肉已經有9塊,不過量多只係其中一項指標啫。譚仔嘅腩肉比其他店硬身,食落冇咩腩肉味;反而墨丸高質得多,四粒墨丸唔算細,彈過乒乓球,仲食到有墨魚肉碎,絕對唔會有劣質墨丸陣雪味,唔怪得個個嚟譚仔都要叫「勿演」。

土匪雞翼為譚仔招牌菜,因為用咗孜然粉,所以老遠聞到香味。隻隻雞翼都有兩隻手指粗,大大隻脹卜卜令人覺得佢新鮮出爐。咬落去皮脆肉嫩,肉汁「咇」晒出水嚟,出緊少少煙,又唔太熱,成件事啱啱好。怪不得譚仔雞翼一直喺平民美食界稱霸。不過皮蛋要扣分,皮蛋本身不過不失,奈何蛋黃熟晒,上面一撮莞茜亦只係裝飾,做唔到味道上嘅化學效應,可惜可惜。

兩碗米線啲料多到滿瀉!

皮蛋$19

土匪雞翼$28
平民米芝蓮 譚仔三哥雲南米線
好多人話三哥正宗啲,計我話拎過米芝蓮威水啲。筆者以前一直覺得三哥湯底豬骨味比較濃,麻辣會比較辣。其實試多幾間先發現,原來間間譚仔同三哥嘅水準都有出入•以觀塘嚟計,開張冇耐嘅三哥x忌廉哥主題餐廳個湯比較濃,但辣又及唔上九龍灣得寶間三哥。

論配料,其實筆者真心唔覺三哥同譚仔有分別,完全係博士級別嘅找不同遊戲。如果唔係特登睇返啲相嚟看圖講故事,筆者可能下世都唔會發現,三哥嘅腩肉少一塊,墨丸細粒啲,芽菜同韭菜都少過譚仔。不過同行嘅朋友就話「腐皮有少少餿味,聞落似行過街市豬肉檔隻味咁。有啲木香,但又帶點腥臭」,我聽完心諗「食米線啫,而家叫你品紅酒咩…」計份量三哥輸譚仔個馬鼻,不過叫兩餸平兩蚊,當打和啦。

三哥自從分家後,佢又加咗幾款新menu,皮蛋款式一開三,有原味、 口水味同麻辣味。原味皮蛋整得唔錯,就算唔食得辣嘅朋友試過都讚好。皮蛋上面有一撮川椒,酸甜得宜又脆口 ,同皮蛋十分合拍。當筆者夾起其中一塊,發覺蛋黃心搖搖欲滴,令人聯想到黑色蛋黃哥。土匪雞翼同譚仔不相伯仲。

三哥自分家後加入唔少新元素,不斷開發新菜式,新menu出世後又唔會話一個月後收返,並非為製造話題而創作。而且連17蚊碟小菜都落足心機整,feel到佢幾有 熱誠。最近三哥亦多咗同其他品牌合作,例如觀塘開咗間三哥x忌廉哥主題店,係少數稱得上有裝修嘅店。姑勿論成效如何,佢不斷畀驚喜食客呢份熱血,已經跑臝好多米線店。

皮蛋$17

大土匪雞翼$28

口水雞翼$23

墨丸腩肉中辣$34
髙檔路線 米線陣
第一次入米線陣,仲以為入去鋸扒。我哋試咗蕃茄湯底同埋麻辣中辣湯 — 蕃茄湯底同其他店唔同,清甜之餘又夠鮮,啲蕃茄唔會溶晒喺湯度,搞到「杰撻撻」得個酸字。碗邊有好多蕃茄籽,仲有5、6舊蕃茄肉,望落夠足料,喺清湯方面先加一分。另一碗麻辣湯係中辣,碗湯一啲都唔濁, 更加係唯一一間喺個「麻」字落過功夫。味道方面佢落料唔重,但勝在落得準,碗麵食完時,你仲見到有啲花椒乾椒游來游去,個嘴同條脷仲會有少少痺,麻辣湯再加一 分。

雖然價錢相若,36蚊碗兩餸米線,但配料比較少。腩肉加7蚊,屬最高消費行列,不過得5塊,牛丸6蚊得3粒細嘅,扎肉亦唔厚……如果你係大食積就一定唔夠喉,好在啲料算新鮮。可圈可點嘅係同樣加6蚊就揀到3粒鮮蝦雲吞,雲吞有原隻蝦,咬落爽口彈牙,有返些少誠意。

大汗雞翼有別於平日食開嘅新疆土匪嗰類,侍應姐姐拎上檯時唔香嘅;雞翼上面有啲薑黃色嘅粉狀物,蘸一蘸,食落第一 啖冇乜特別,又唔覺辣,但有香料味滲出嚟。最頂癮係過咗冇耐微辣 嘅味道愈來愈出,呢招真係估佢唔到。

樂富米線陣感覺上比其他米線店高檔,價錢冇貴到,如果只叫一餸米線,30蚊一定落到樓,但配料份量真係少得好緊要。侍應大部份係阿姐,但口音已經進化晒,唔會講到「勿演懶肉」。餐廳裝修比其他米線店high class得多,有雲石牆嗰吓真係呆咗。 無論係食米線定食個氣氛,不久嘅將來筆者一定會再嚟食。

椰汁紅豆冰$12

大汗雞翼$28

貌似係招牌菜,可以一戰
總結
我正式宣佈米線陣係今期大比拼嘅冠軍!講裝修,大大塊雲石牆無得輸;論侍應質素,其他三間「牡得挽」;講米線,又贏三哥同譚仔一個身位。米線陣喺配料上蝕咗,但又有幾多人會為咗少一粒「勿演」而覺得唔抵食?不過最可惜係米線陣分店少,平日落街想食返碗,反轉成個太西洋最後都係死死氣去咗譚仔同三哥,真係[sosad]

【後傳】落單秘技篇
我表姨個三表姐個細妹喺某間米線舖做,據內部消息人士透露,為免外界盗取米線界最高機密,各大米線舖發展出一套獨立加密語言,一眾阿姐入職時經已背到滾瓜爛熟。記住下次落單嗰陣用呢套術語,佢哋就知你係自己友嚟,隨時會醒多粒墨丸畀你,落單無往而不利(好似係)。

阿姐術語解碼

勿演 > 墨丸 淆肉 > 牛肉
姨蛋 > 魚蛋 之肉 > 豬肉
淆演 > 牛丸 畜牲 > 竹笙
懶肉 > 腩肉 之忍 > 豬潤
街肉 > 雞肉 凍拎死>凍檸水

相關文章

更多文章

《鄧寇克大行動》
救得一個得一個

 KS 於 4小時之前發表

拍過漫天星際、超級英雄、罪犯,連至連超難拍魔術題材都有涉足的「神導」基斯杜化路蘭,今回首度觸及歷史題材,執導《鄧寇克大行動》—於二次大戰期間,英法聯軍於法國鄧寇克,被德軍步步進逼,...

詳細閱讀

《Pokemon Go》首個大型活動噓爆結束

 航仔 於 4小時之前發表

《Pokemon Go》喺香港嘅熱潮雖然減退,但外國仍然相當流行,早前Niantic公布於芝加哥Grant Park舉行首個大型活動「Pokemon Go Fest」,講到明會有稀...

詳細閱讀

集80年代流行文化大成
史提芬史匹堡新作《Ready Player One》

 航仔 於 5小時之前發表

導演史提芬史匹堡新作《Ready Player One》預告見街,正如改編自同名科幻小說,劇情同虛擬實境及大量流行文化元素有關。故事講述2025年現實生活枯燥無味,新世代人類「mi...

詳細閱讀

《Captain Marvel》發生於90年代
Nick Fury雙眼健全現身

 航仔 於 6小時之前發表

現時有關《Captain Marvel》電影資料相對較少,最近Marvel Studios總裁Kevin Feige喺SDCC座談會上終於透露相關資訊,電影故事背景定於90年代早期...

詳細閱讀

《正義聯盟》4分鐘預告暗示超人歸隊

 航仔 於 8小時之前發表

美國SDCC動漫展精彩消息一浪接一浪,先嚟係《正義聯盟》長達4分鐘嘅預告片,為導演薩克薛達離任後嘅首個官方宣傳片段,畫面較光猛,部分畫面色彩比上一段預告調得略為鮮艷。......

詳細閱讀

《悍戰太平洋2》宣傳短片曝光
五部全新機體亮相

 航仔 於 1日之前發表

機械人打怪獸自細睇唔少,但上得大銀幕而又夠熱血首推《悍戰太平洋》,續集《Pacific Rim: Uprising》宣傳短片以招聘駕駛員廣告形式公布,同時機甲獵人官網GoJaege...

詳細閱讀