吃喝玩樂

Hi你唔好再細啲?
細蓉大比拼

巴絲打10個月之前發表

梁國雄議員不滿圖太細,港男不滿女友上圍細,港豬不滿新樓愈劏愈細,「細」喺 香港仲慘過原罪,尤其做飲食,樣樣都要做到好食夾大份,唯獨是「細蓉」好似攞正牌,麵底兩啖見底,四粒餛飩真係可以一口啪晒。但事實上係細蓉幾細碗都唔驚俾人問候,點解人類咁厚此薄彼?
細蓉,學術啲又可以叫餛飩麵,據聞有人會分中蓉同大蓉,餛飩數閏同麵餅都有規定。不過依家已經好少人咁分,反正如果你想食多啲,麵家會建議你叫多碗。

今期大比拼主角分別搵咗池記、一粥麵同麥奀雲吞麵世家。可能你會話我樓下嗰間 乜記仲正啦!為保持隊形,我哋只會選一啲分店較多嘅店舖去做比較,至少大家 睇完篇文,想幫襯或挑戰都易啲,係咪咁話?

計分方法我哋會繼續採用比較制,一星化表三間之中最差,三星代表三間之中最好。 如果打成平手,就三間都畀二星,或者一間一星、兩間三星。所以一星並不一定代表好差,只係三間之中最差,反之亦然。
池記
池記係行較高檔路線嘅粥麵連鎖店,價錢偏貴、食品重質、份量唔多、味道偏淡、賣相唔錯,擺明面向一眾自命有品味又講求健康嘅朋友。$36碗餛飩麵,雖則個碗偏細,但如果同出面其他大部份麵店比較,份量冇少到,只係個碗影響咗觀感。餛飩size少少 偏細,不過一碗有五粒,整體計落應該都夠女士或食量偏少嘅男士醫肚。

份量同賣相合格,咁味道又點呢?餛飩麵麵底一般,唔算彈牙但又唔太軟。筆者個人比較偏好呢種口感,因為太彈牙嗰啲會咬都牙骹都軟埋,一碗都未食完已經冇力繼續食。 最值得讚係個湯,清得嚟蝦味好夠,讚!至於餛飩,料足,蝦爽口 ,整體計不過不失。

老老竇竇最初筆者預計池記只係陪跑,因為之前一直都覺得佢又貴又淡。不過今次佢嘅餛飩麵除咗價位輸蝕,份量同味道又唔錯喎,考慮到佢形象方面比較高級而收貴少少, 又好似合情合理啵!

外觀 ★★★
湯 ★★★
麵 ★★
餛飩 ★★
份量 ★★★
售價 $36
性價比 ★★

餛飩皮算薄,而且仲有五粒咁多

豆漿成廿蚊杯真係……不過下午茶時段叫餛飩麵有得送嘅

麵底不過不失,份量亦可接受
—粥麵
三間之中只有一粥麵喺形式上做到快餐店咁,大家去收銀姐姐度買飛,再去水吧拎嘢食。可能係行快餐店形式運作嘅關係,三間當中佢價錢最合理,食品選擇亦最多。買飛時筆者話要碗餛飩麵,阿姐竟然問要大蓉定細蓉,原來下午茶時段會有較細份嘅細蓉選擇,但售價只差$2。甶於另外兩家都係細蓉,所以筆者決定點呢碗$25嘅細蓉同另外兩間比較。

一粥麵細蓉唔算特別細份,但只得三粒餛飩,正常人實話:「Hi !早知畀多兩蚊買碗 有五粒嘅大蓉啦!」感覺好似去到超市,見到一支可樂賣$12.8,兩支就特價$13.5焗 人買兩支。講返碗麵,麵質同池記相若,湯淡少少,多咗陣好淡嘅鹼水味,還好餛飩肉味夠,蝦亦算彈牙,單計味道,一粥麵嘅細蓉並唔輸蝕。

以大蓉$27—碗有五粒餛飩計,其實同坊間大部份麵舖差不多價錢。但連埋飲品例如 加罐可口可樂連冰底,都只係加$4,晚飯時間更可以加$1就多碟菜或者小食同一杯飲 品(凍飲同特飲再加錢),計落平過唔少細麵店,抵到爛!

外觀 ★
湯 ★★
麵 ★★
餛飩 ★★
份量 ★★
售價 $25
性價比 ★★★

餛飩味道不錯,但皮較厚

筆者揀咗細蓉,麵嘅份量唔會太細

相比其他兩家,一粥麵有更多食品選擇, 餛飩麵方面亦做到唔錯嘅水準,算係咁啦
麥奀記
「麥奀雲吞麵世家」即是鼎鼎大名嘅「麥奀記」。麥奀記將細蓉發揚光大,唔少人願意畀高出接近一倍嘅價錢去食佢一碗份量只係一般麵舖一半嘅餛飩麵。近年麥奀記開咗唔少分店,符合我哋比較嘅條件,所以今次都揀埋佢。

計整體份量,麥奀記明顯細得多,雖然餛飩有四粒,但size亦比較細,$36—碗真心貴。 味道方面,全蛋麵口感同上兩者差唔幾,唔會令你覺得特別正。佢哋強調用大地魚熬湯增加鮮味,可能係筆者比較膚淺啦(鋼盔已戴),餛飩麵個湯不單止少咗應有嘅蝦味,個湯又唔清,扣分。餛飩雖然明顯比較細粒,但做到皮薄餡靚,啖啖有蝦肉!不過,食麥奀記細蓉僅屬朝聖,開餐前影張相放上Facebook呃Like係OK,計性價比實在太低,試過就算喇〜

外觀 ★★
湯 ★
麵 ★★
餛飩 ★★
份量 ★
售價 $36
性價比 ★

餛飩都特別細,但算得上皮薄餡靚

以細蓉聞名嘅麥奀餛飩麵份量堅細, 相信好多人都唔夠食
總結
對於筆者呢種食慣平民嘢嘅窮拎,今次比拼當中有兩間係攻打中高檔路線客戶,一開始已經有少少唔公平,因為一講性價比,價高者幾乎必輸,所以筆者喺呢個環節亦講吓三間餛飩麵邊間味道最好。或者大家睇完上面嘅評價都估到,筆者認為池記係三間當中整體味道最好嘅一間,確實係意料之外。不過無論你揀邊間,都要有定心理準備,單叫一碗份量未必夠飽,最後可能要畀多少少錢叫多兩碟嘢填肚。

相關文章

更多文章

巿場熱潮不退  Apps開發人才有價有巿
免費 - Android Apps Development開發工作坊

 資料由客戶提供 於 4小時之前發表

根據今年年頭市場研究公司 App Annie 公布的 2016 年數據,Google Play 與 App Store 去年總下載高達 900 億次,除了次數比 2015 年同期增...

詳細閱讀

《殺破狼.貪狼》預告
越級抗陰謀

 KS 於 1日之前發表

葉偉信導演的代表作,除了是「宇宙最強」甄子丹的《葉問》系列,又或者另類到爆的《生化壽屍》外,在此之前由他執導的《殺破狼》系列也是近年港產動作電影的代表作之一。不論《殺破狼》、前傳《...

詳細閱讀

Note賣點擴展至Windows
Samsung Galaxy Book

 蛇叔 於 2日之前發表

Samsung去年開始以Galaxy系列打入Windows tablet市場,不過為勉同Android系列混淆,今年索性將型號改為Galaxy Book,唔知設計上有咩特別呢?.....

詳細閱讀

《銀魂》預告
待望已久改編作

 KS 於 2日之前發表

說好了的《銀魂》真人版電影,已定於8月17日於香港上映!今回《銀魂》的故事,會以隱身於自家萬事屋的超強武士坂田銀時,跟同伴神樂、新八接下奇怪委托開始,及後更需集眾人力量,登上不明宇...

詳細閱讀

傳《正義聯盟》未補拍前嘅版本「好難睇」

 航仔 於 3日之前發表

近期有不少報導指《正義聯盟》補拍部分比想像中多,Batman-on-film.com嘅Bill Ramey表示,佢收到風話導演薩克薛達嘅初步剪接版本實在「睇唔落」,拍到非常陰暗同混...

詳細閱讀

Dota 2世界頂尖玩家不敵OpenAI

 航仔 於 3日之前發表

早前Dota 2 國際邀請賽中有一特別表現環節,大會邀請曾獲世界冠軍嘅職業玩家Dendi,與「Iron Man真人版」企業家Elon Musk創立嘅非牟利組織OpenAI及其同名人...

詳細閱讀