吃喝玩樂

【超邪惡流心狗糧】
日本直送士多啤梨蛋糕炒麵食評

女漢子5個月之前發表

是咁的,相信有去開韓日食品店或者熟悉日本嘅巴絲,都會聽過明星食品出產嘅「一平夜店炒麵」。正常味道係好食嘅,但佢哋非常鍾意製作特殊口味,就好似上月新出嘅草莓蛋糕味。筆者身先士卒托人帶咗盒返嚟試食,一放入口心諗:「我究竟食乜X……」
呢盒麵味道正式名叫Shortcake(ショートケーキ),即係我哋叫開嘅水果忌廉蛋糕。唔使開封淨係望住包裝右上角張相,雲呢拿味蛋黃醬溝士多啤梨乾再溝彩虹條,加上不明白色顆粒,睇圖都知伏味濃。開封後蓋紙有清晰圖解食用指示,唔識日文亦問題不大,不過有個問題:冇叉用,要自備。盒內總共有三包配料,分別係底味醬汁、疑似雲呢拿味嘅白色蛋黃醬同乾料。

包裝紙右上角參考圖令人不安

蓋紙有晒圖同1、2、3,冇理由唔識焗呀?

(左起)超邪惡蛋黃醬、底味醬汁、乾料

包乾料有士多啤梨乾、彩虹條同白色糖粒
跟著落嚟同平時食炒麵王做法差唔多,落滾水到刻線位焗3分鐘、倒水,撈料食得。值得一讚係佢個開倒水位冇香港啲咁慳皮,設計好又實淨,將成盒麵180度倒轉,半條麵都冇瀉出嚟,勁!打開個蓋啲麵味湧出嚟,份量比想像中多,感覺真材實料,不愧係日本出品

落滾水到刻線位

出水位個設計好好,香港應該學習吓

開封,啲麵真係好香
之後落醬先係戲肉,嗰包藍色醬汁係糖漿嚟架喎大佬!抱著必死嘅覺悟開包白色醬汁,聞落冇頭先咁嚴重,但唧落去噁心指數要畀10分,灑埋包乾料就大功告成,好想即刻倒落廁所。掙扎完一輪,撈兩嘢放入口,首先襲來一陣老麥熱香餅餐糖漿甜味,夾雜少少鹹味,忽然又食到滑潺潺嘅白色醬汁,然後係脆口嘅士多啤梨乾同白色粒粒(食完到而家都唔知佢咩嚟,忌廉乾?)。同一時間3隻味、4種口感喺口腔內交戰,完全分唔清自己食緊甜品定炒麵。雖則盒麵未至於難食到嘔,但再戰?不了。補充一點:啲白色醬汁唔多夠,食到底得番糖漿同鹹味,劣食層次感會高啲。

先落糖漿…成陣化學甜味攻上鼻

然後係雲呢拿味蛋黃醬

整張超近鏡畀大家睇,係咪好衝擊呢?

加乾料,提高成個麵色彩層次

完成品都幾似封面圖

本著不要浪費食物嘅精神,頂硬上食清光
【仿製狗糧】自製香港山寨加強版
對劣食情有獨鍾嘅巴絲如欲跟機,又無法自己買或請朋友仗義入貨,喺度提供個折衷方案畀你:老麥糖漿+士多啤利新地+淨炒麵王,唔使落晒全部嘅,每樣落少少就夠。劣化糖漿加上人造士多啤梨醬同雲呢拿,衝擊程度比起士多啤梨忌廉蛋糕麵有過之而無不及,試食一啖直頭想嘔。好彩冇乜aftertaste,隻味快來也快去,飲幾啖水走七成,唔似得蛋糕麵咁要飲兩杯茶先散得走一半,如果食完唔記得洗手,隻味留喺手指頭足足一個鐘,感覺幸福美滿。

集齊三樣神器

個樣核突過正版,隻味都係
【預告】一平夜店炒麵朱古力醬2017版
利申,筆者冇自虐傾向,但今個月新出嘅「一平夜店炒麵朱古力醬2017版」將繼續以友情托運方式月底抵港,到時會做死士食多次。筆者曾親身現場睇朋友示範食舊版本,聞到隻味即刻彈開三呎走避,高lv過士多啤梨忌廉蛋糕,有興趣嘅巴絲敬請留意。

相關文章

更多文章

半年後高價拆售
《CoD: Modern Warfare》重製版率先登陸PS4

 航仔 於 1小時之前發表

上年Activision見《Call of Duty: Infinite Warfare》受盡負皮困擾,公布預購特典捆綁《CoD: Modern Warfare Remastere...

詳細閱讀

Meizu Pro 7未發佈價錢已偷步曝光

 蛇叔 於 3小時之前發表

大陸手機向來都係講性價比之爭,不過今年稍微有驚喜嘅大概會係Meizu下個月嘅Pro 7,全因佢將副屏幕搬到機背。發布會都未舉行,網上已經流出售價同規格。......

詳細閱讀

堅定流?Dreem頭套自稱可提升深層睡眠時間

 女漢子 於 4小時之前發表

唔少健康手帶或相關手機app均具備睡眠監測功能,識得分析用戶深層及淺層睡眠時間,雖然有助了解個人睡眠模式,但對提升睡眠質素欠缺實際效用。初創公司Rythm就研究咗一個名為「Dree...

詳細閱讀

《蜘蛛俠:強勢回歸》預告
兩度Reboot會如何?

 KS 於 4小時之前發表

可能大家會認為第一代由杜比麥奎爾及姬絲頓登絲主演的《蜘蛛俠》,是因為爛得不能而需「零分重作」,但老實說,上一回由安德魯嘉菲及愛瑪史東主演的reboot版:《蜘蛛俠:驚世現新》,連票...

詳細閱讀

日版mini超任公布
兩版本內置遊戲比較

 KM 於 4小時之前發表

尋晚半夜筆者瞓瞓下都爬起身同大家報導美版mini超任嘅消息,估唔到今日起身日版就公布埋喇!除咗外形跟返原日版超任之外,呢部日版所內置嘅遊戲亦唔係完全相同,下面就同大家詳細講講。.....

詳細閱讀

HTC U11 Edge Sense將增加更多功能

 蛇叔 於 5小時之前發表

HTC U11除咗相機同規格勁,另一個賣點就係Edge Sense,但基本快捷鍵之外現階段就好似冇咩特別,好彩日前HTC預告Edge Sense將會支援更多app功能。......

詳細閱讀