吃喝玩樂

Jack:前作太經典好難媲美
《Mass Effect:Andromeda》亦值一玩

Jack4個月之前發表

講起《Mass Effect》呢個系列,我知香港真係唔太多人有興趣,但呢隻Game喺外國就真係一隻超經典RPG遊戲。自從《Mass Effect 3》完咗後,以Commander Shepard為主嘅故事亦告一段落,全新嘅《Mass Effect:Andromeda》(下文簡稱《MEA》)將會係全新故仔全新角色,舊Fans要唔要玩?新人又係唔係可趁機入坑?
600年後仙女座
今集個故事設定係前三部曲之後嘅600年,故事一開設就講主角成船共約20,000人冷凍睡眠咗600年去醒返,亦即係話佢哋其實係同前三部曲嘅主角係同一個時代嘅人。至於故事舞台設定於外宇宙,以「仙女座計劃」為核心嘅宇宙移民船團去到位於仙女座嘅宇宙空間,點解要去呢到係因為覺得呢個地方會有合適人類居住嘅行星,人類為咗搵新家園而要嚮呢個完全陌生嘅環境中面對各種嘅挑戰。而主角作為前線「Pathfinder」(開拓者)一員,首先會先到目標星球睇下個環境,當中會跟嚟自唔同地方嘅外星文化接觸,當然更會產生衝突啦!

◆ 於新世界入面究竟會見到啲咩呢?
硬派西洋風RPG
唔好以為《MEA》只係一隻射擊遊戲,你咁諗就真係錯到離晒地,其實一直以來《Mass Effect》都係以RPG為賣點,《MEA》承襲咗系列風格,繼續都係走呢條路,不過有唔少位都見到係有改變。就好似前三集一開始係需要玩家設定好主角個樣同埋職業,今集呢啲就欠奉,咁唔代表佢少咗嘢,於故事進行途中主角會同唔同NPC進行對話,有事會需要你對NPC嘅回話選擇回答,而俾你選擇嘅回答方式就會決定主角往後性格同能力上嘅發展方向,呢點如果你有玩過近期隻《Fallout 4》你就會明白。另一個對角色能力有決定性影響就係能力值。玩家可以自行分配得到嘅能力值至唔同嘅技能上面,造出自身風格嘅主角。呢個自訂化系統仲會影響埋角色外型以至名稱。
◆ 選擇唔同嘅回答句子,係會影響到主角嘅性格;性格亦直接影響到角色嘅能力、小隊嘅合作性等。
◆ 角色能力可以自訂,槍亦有位可以俾大家附加Parts增加能力。
與「任何人」發展愛情
感情線嚮《Mass Effect》系列入面一直都有相當重比例,同外星人發生超友誼關係唔再係唯一重點、男男、女女呢類同性戀關係都可以於遊戲當中出現,而且仲要係有畫面有影片嗰隻喎!主角小隊亦同前作一樣可以由唔同外星種族嘅戰友組成,各有各能力,配搭得好會令隻Game變得好易玩。
◆ 同外星人組隊出生入死究竟係點感覺嘅呢?
◆ 老老豆豆,我真係接受唔到同呢位外星女生發展關係。
奇怪嘅第三身射擊
《MEA》係一隻第三身視點(TPS)進行嘅射擊遊戲,無論係角色移動或者係槍戰部份都如是,如果有玩開前作的話,操作上基本上都係差不多,而呢個系統對新手來講亦都好易適應。唯一想講係個掩體系統,因為進入掩體唔需要按掣,只要個位可以俾你掩到就會自動進入掩體。但問題就嚟喇,例如前面有舊石,我以為我走埋去就可以成為一個掩體,點知原來呢舊石只係一個裝飾佈景,走埋去掩唔到即時成為人肉箭靶,死得好慘。
◆ 除咗《Gears of War》系列外,用TPS呢個方法進行嘅射擊遊戲已經唔多咯。
弊傢伙!等出Patch
相信唔只我,好多人都會認為用上Frostbite 3遊戲引擎嘅《MEA》理應有上佳嘅畫質,我玩PS4版,我覺我成隻Game嘅畫質係屬中上,唯獨所有人物除外。仲記得本作當初發表時條Trailer,入面嘅人都做得好靚,男角帥女角索,點知去到成品出街後,所有人物嘅造型都好生硬,表情欠奉之餘仲好膠,最大鑊係對眼,全部都係死魚眼,冇神嘅!唔只喎,對比起前三集個故仔,今集個故仔真係平淡過凍滾水,我玩咗大約8小時,真係好悶,悶到我提唔起勁玩落去。作為前三部曲嘅Fans,見到新一集個故仔弱過藥煲,如果仲有新一集的話真係唔知點樣撐落去。據知BioWare好似正在整緊Patch,主要係修正人物造型等佢哋冇咁硬膠同埋多返嘅面部表情,不過故仔方面應該都冇咩得點救。望一望隻《Fallout 4》,再睇返隻《MEA》,我明點解到而家都仲有人買《Fallout 4》。
◆ 無論係主角定係NPC,好多時雙眼都會死魚咁,就如圖所示。
◆ 呢個係外國網站做嘅PS4同PS4 Pro畫面對比,我就真係唔係太覺有分別。另外有外國網站話隻Game嚮PS4及PS4 Pro上面只有30fps,呢方面我又係冇乜點考證過,不過我用PS4玩係有時會跳。
總結
嚟到呢度,你可能覺得我對《MEA》唔係好客氣,皆因我本身對佢太有期望。誠然《MEA》都唔算係唔好玩,始終有返個底喺到,再加上BioWare呢個名係有保證,只不過前三部曲真係太正太經典,好似我呢口啲老鬼好難唔搵嚟同《MEA》作比較,一比起上嚟真係新不如舊。如果你從來冇玩過《Mass Effect》系列嘅,又唔介意隻Game冇中文字幕嘅,其實呢隻作品真係唔應該錯過,尤其要硬派RPG及玩槍射嚟射去嘅,呢一期真係只此一家。

遊戲開發:BioWare
遊戲發行:Electronic Arts
遊戲類型:ARPG+TPS
遊戲平台:PC / PS4 / Xbox One
遊戲人數:1至4人
遊戲售價:$449
推出日期:已推出

相關文章

更多文章

HTC Vive劈價200美金
599美元有交易

 航仔 於 2小時之前發表

HTC Vive初始定價冠絕其他同類型產品,加上對手Oculus Rift早排割價出售,現在HTC亦宣布減價200美金,即日起售價調整為599美元(HK$4,686),而台灣地區V...

詳細閱讀

腦場電腦節8月23日開幕
1蚊搶購電競主機

 航仔 於 5小時之前發表

腦場電腦節將於8月23日至29日一連七日喺深水埗黃金電腦商場、高登電腦中心、新高登電腦廣場舉行。其中最受歡迎嘅活動當然係「$1瘋狂搶購」,據報導有人早5日已經喺場外排隊,更於欽州街...

詳細閱讀

《Uncharted》導演期望電影會成為新世代《奪寶奇兵》

 航仔 於 6小時之前發表

《Uncharted》出名劇情緊湊,轉戰電影界會有乜嘢目標?導演Shawn Levy希望主角Nathan Drake年輕時期嘅尋寶故事能夠時為新世代《奪寶奇兵》,電影預計分成4集,...

詳細閱讀

《模擬樂園》死亡過山車進化版?
《侏羅紀世界》模擬經營遊戲下年推出

 航仔 於 7小時之前發表

有睇過《侏羅紀公園》系列嘅朋友都知道,公園嘅管理同保安措施係幾咁「精密」,唔係點會次次都發生恐龍暴走意外,Universal與Frontier Developments公布《Jur...

詳細閱讀

Galaxy Note 8定9月15日推出?

 航仔 於 1日之前發表

三星上個月公布於8月23日紐約公布Galaxy Note 8,爆料專家Evan Blass稱手機公布後第二日(24日)即展開預訂,並且會定於9月15日上市。Blass指出預訂選項分...

詳細閱讀

向打和說不
《哥斯拉對金剛》導演話結局會有勝利者

 航仔 於 1日之前發表

《蝙蝠俠對超人:正義曙光》同《美國隊長3:英雄內戰》入面嘅人氣英雄角色都冇分出勝負,避免得罪兩邊支持者,而《哥斯拉對金剛》似乎唔打算取巧,導演Adam Wingard受訪時談及預計...

詳細閱讀