LEGO城堡系列一向都不乏捧場客，何況係《哈里波特》霍格華茲城堡？新版霍格華茲城堡71043比前作4842更宏偉，積木總數達6,020塊，喺LEGO最多積木件數嘅組合排行第二，僅次於《星戰》千歲鷹。

城堡成品長43cm、闊69cm、高58cm，要搵地方擺都唔易，產品與神盾局航空母艦同屬微縮款，要配合Microfigure嚟玩，喜歡標準LEGO人仔嘅玩家可能會失望。Microfigure總數達27隻，除咗主要師生角色外亦有攝魂怪及學院學生，另跟四大學院兼始創人嘅標準LEGO人仔。